تعليق مؤقت


الاخبار فى المدونة هنا معلقة مؤقتا لاعتصام صاحبها فى التحرير

12:02 AM | Posted in , , | Read More »

Back To Tahrir

 
 
باختصار شديد
اللى مانزلش التحرير وشاف بعينيه وشم بمناخيره
اللى ماعطسش م الريحة وعينيه ماحرقتوش م الدخان
اللى ماشالش قلبه على كفه وهو نازل وفى احتمال مايرجعش بيته تانى
اللى ماوقفش على اول محمد محمود وحاول يدخل عشان يساعد الناس اللى جوة واللجان الشعبية منعته عشان الوضع مايسوءش اكتر
اللى ماشافش الموتوسيكلات وهى بتنقل المصابين اللى بيموتوا وشافهم بعينيه وفى متطوعين بيحاولوا يساعدوهم ع التنفس
اللى ماشافش الناس بتوزع عصير مجانى ماركة كنتاكى
اللى قاعد وممدد ع الكنبة ومش بس بيقول ادى اللى خدناه م الثورة, لا ده حتى اللى قاعد مريح وبيقول يااااه دول بيتعبوا يااااه بيضربونا تانى

ماشافش حاجة وماعرفش حاجة

انا حسيت النهاردة بكمية غضب وحماس جوايا ماحسيتهاش فعلا من فبراير اللى فات

وبس

5:45 AM | Posted in | Read More »

تمخض الجمل فولد فأرا



انتظر المصريون طويلا
ثم انتظروا
واخيرا خرج علينا رئيس الوزراء الثائر د. عصام شرف فى بيانه الى الأمة

البيان الذى تم الاعلان عنه على انه سيحمل قرارات مهمة وقوية
البيان الذى تأخر لأكثر من ساعة ونصف لاسباب غير معلومة
وجاء البيان
وبدا ب(اعتقد ان انتوا تتفقوا معايا ان احنا بنمر بلحظة تاريخية) .. وانتظرت شخصيا خطاب تاريخى يليق باللحظة التاريخية
ثم (اصدرت القرارات التالية) .. وترقبت القرارات التاريخية
وجاءت ال(قرارات) .. بلا قرارات!

1- اجراء تعديل وزارى خلال اسبوع
2- اجراء حركة محافظين تتفق وتطلعات الشعب قبل نهاية الشهر الجارى
3- تكليف السيد وزير الداخلية بالاسراع فى اعلان حركة وزارة الداخلية
4- اناشد المجلس الاعلى للقضاء بتطبيق مبدا العلانية على جميع محاكمات رموز النظام السابق على ان تكون المحاكمات منجزة ليطمان الشعب وترتاح اسر الشهداء
5- اصلاح هياكل المؤسسات الصحفية فى اسرع وقت

لماذا أعلن الدكتور عصام شرف تشكيل الوزارة الجديدة حين تولى رئاسة الوزارة فى خلال يومين (والتى يرفض رئيسها وجود 8 اعضاء منها!)
وعلينا الان انتظار اسبوعا كاملا للاعلان عن الوزارة الجديدة؟
لماذا وضع موعدا محددا لاجراء الحركة وهو 15 يوليو, وهو نفس الموعد الذى كان معلنا من قَبل من قِبَل وزير الداخلية
طب ليه هاتنهى خدمة قيادات الشرطة اللى اشتركوا فى قتل الثوار من غير ما تحقق معاهم؟؟؟ ليه ما اكتفيتش بإيقافهم عن العمل؟
هياكل المؤسسات الصحفية فى اسرع وقت .. اللى هو امتى؟ .. واشمعنى الهياكل الصحفية, فين الاجهزة الادارية والقيادات فى التعليم العالى وغيرها من المؤسسات الحكومية؟

وخرجنا من البيان ب(قررت ان اتولى بنفسى رئاسة مجلس ادارة صندوق رعاية ضحايا ثورة 25 يناير)

وانتهى البيان فى دقيقتين, انتهى قبل أن يبدأ


فين القرارات؟
فين اخبار الشعب بأن قرار انهاء خدمة قيادات الداخلية هو مؤكد وانه يستم فتح تحقيق عاجل معهم جميعا؟
فين علاج مصابى الثورة على نفقة الدولة وفى مستشفيات الدولة؟ والمستشفيات العسكرية مش بس المدنية .. زى ما المحاكمات بتكون محاكمات عسكرية
فين القرارات؟

هل كان هذا البيان القصير ليعلن فيه رئيس الحكومة توليه بنفسه مجلس ادارة صندوق رعاية ضحايا الثورة؟
أم ليصبح كبيان مبارك الثانى؟

11:11 PM | Posted in | Read More »

عمرو فكرى: غلطة, وندمانين عليها

[My+Pic.jpg]


احنا فعلا غلطنا لما سمعنا كلام حزب الكنبة ومشينا وسيبنا الميدان

عشان مفيش خريطة طريق واضحة
عشان مبارك بقاله 5 شهور متنحى وما اتحاكمش
عشان المخلوع نايم ف مستشفى شرم الشيخ بينال رعاية خاصة وجايله طقم رعاية من المانيا ولا كأنه مذنب
عشان سوزان مبارك تعالج سنانها على نفقة الدولة, ومصابى الثورة يتلقحوا ف المستشفيات بال4 شهور لحد ما ماتوا
عشان جمال وعلاء ماحدش يعرف هما ف الحجز ولا لا
عشان حبيب العادلى لحد دلوقتى ماشفتوش بلبس الحجز ومعرفش محبوس ولا لا
عشان القناصة اللى معروفين بالاسم اللى كانوا فوق هيلتون رمسيس يصطادوا الناس لحد دلوقتى ماحدش حاسبهم
عشان امين الشرطة اللى قتل الناس والعسكرى اللى رقص بالسيف والظابط اللى شاور اشارات بذيئة للناس
عشان الحرامية اللى محكمة الجنايات طلعتهم براءة
عشان القضاة خدوا اجازة شهرين ولا كأننا فى حالة حرجة
عشان عصام شرف رئيس وزراء الثورة يطلع بيان ضعيف ومتأخر 5 شهور
عشان العيسوى يقول انه مش قابل اوامر عصام شرف بانهاء خدمة قتلة الشهداء
عشان مبارك والعادلى ايدهم لسة ملوثة بدم الشهداء
عشان الشرطة مش فى خدمة الشعب

عشان كل ده .. لسة الثورة مستمرة

مصر محتاجاكم
هاتساعدوها؟

9:32 PM | Posted in , | Read More »